خاطره:عمرو يسرى
هو دا حالنا ياسادة وهى ديه الحكايه
تلميذ له حق عند استاذه
واهله كانوا خايفين ليترفد لو ما اعتذرش لاستاذه
دا هيبقى من غير شهاده واحنا بلد شهادات ياسادة
مش مهم انه يحس انه بيتظلم او يتعقد المهم يكمل وياخد اى شهاده
ماهو احنا بلد شهادات
صحيح ملهاش قيمه زيها زى الاحصائيات
اللى كانوا بيقوله فيها اقتصدنا معدله عالى
بالرغم ان شحاتينا كانوا معدلهم اعلى
وديه حاجه من الحاجات اللى تخلى الدماغ عالى
من غير حشيش ولا افيون عملولنا دماغ ليلاتى
المهم الطلاب قاموا بثوره والاستاذ قال ديه مؤامره
والفصول اللى عملوها فصول مشاغبين
اعذروه مايعرفش ان المدرسه فيها فصول للمتفوقين
بس قالها ياانا يا الفوضى طبعا ما لو مشى مين هيدير الفوضى
ماهواللى صنعها ورتبها
اولى اول عشوائيين واولى تانى المهندسين
بس خلاص انكشح واتخلع والطلاب لغيره هترشح
بس الطلاب امزجه فى طالب عايز مدرس من على السور ينططه
وطالب عايز مدرس يعلمه
وطالب مش عاجبه مدرس بيسب الدين وطالب عايز مدرس دين
والكل عرف السكه طوبه فى الازاز هيغيروا الاستاذ
الاهالى قالوا مشاغبين عملوا فوضى
كان له حق الاستاذ واحنا اسفين ياريس قصدى يااستاذ
وخافوا من الاختلاف وقالوا ازاى بلد تقوم واهلها بينهم اختلاف
نسيوا ان الانسان اتخلق من روح ونفس وجسد 3 طبائع بينهم اختلاف
ما اتخلقش من نسيج واحد لكن اتخلق من انسجه مختلفه اندمجوا فى واحد
وعملوا الانسان
اللى بيعمر ويبنى اى مكان
ليهم حق يطلبوا الاستقرار
وكلنا معاهم بس الاستقرار بدون كرامه بيبقى مرار
ماكان شكلنا عايشين فى استقرار
والناس بتجيب اكلها من الزباله وطعم حياتهم مرار
وهى ديه الحكايه
وهو دا حالنا يا ساده
المشاركات
0 التعليقات:
إرسال تعليق