ماذا عن وحدة الصف

مقال : محمد الزينى

هل من المفروض أن تضع القوى الثورية يدها في يد الاسلاميين من جماعة الاخوان

المسلمين والسلفيين لما يسموه بحماية الثورة من الفلول والمجلس العسكري والتوحد في المطالب ضد رجال نظام مبارك ؟

!

في يد من رفضوا التوقيع على وثيقة 6 ابريل التى طرحتها اعتراضا منها على تأجيل أية اجراءات لصياغة الدستور الا بعد انتخاب رئيس الجمهورية والعمل على التفاف جميع القوى السياسية حول مرشح ثوري واحد

..

هل سترضى أيها الاسلامي أن تضع يدك في يد شباب بياخدوا ترامادول و200 جنيه علشان يعملوا مظاهرات واحتجاجات وشباب بلطجية مش عايزين يطبقوا شرع الله, في يد 6 ابريل الخونة والعملاء والممولين من الخارج, في يد شباب مش هم الشباب الطاهر اللي نزل يوم 25 يناير, في يد شباب هتفوا ضد المشير الذي هو الأمير وحبيب الله, في يد من أوقفوا عجلة الانتاج بمظاهراتهم واعتصاماتهم الفئوية ... بعد كل ده لو أنت ترضى أنا مرضاش ليك علشان صورتك هتتشوه بيهم

!

ما تيجوا نشوف التيار الاسلامي رجع ينزل الميدان تاني امتى ورفعوا يافطة مكتوب عليها الشرعية من الميدان والبرلمان معاً بعد ما كانوا بيقولوا الشرعية من البرلمان فقط ونسوا من جاء بهم الى البرلمان ؟

عندما قام المجلس العسكري بترشيح عمر سليمان لرئاسة الجمهورية فدعوا الى مليونية ضد رجال المخلوع وقام أنصار أبو اسماعيل بالتنديد ضد حكم اللجنة العليا للرئاسة بقرار منع أبو اسماعيل من الترشح

..

نزول عمر سليمان له غرض واحد وهو اخراج الشاطر وأبو اسماعيل من انتخابات الرئاسة, المجلس العسكري قال يضرب عصفورين بحجر واحد منه يخرج الشاطر وأبو اسماعيل وهما منافسان قويان ومنه يهدّي الناس بخروج عمر سليمان اللي هو أصلا بديله موجود وهو عمرو موسى

..

ركبت من يومين مع سواء تاكسي ينتمي بمظهره الخارجي الى الجماعة السلفية وكنت لابس شورت تحت الركبة بس وأنا قاعد بيبان انه فوق الركبة وشبشب وشعري كان طويل شوية ومعايا شنطة فسألني

:

أنت رايح تلعب كورة ولا ايه ؟

لأ لابس كده عادي وكمان الجو حر شوية

طيب ما تستتر يابني شوية أنت كده فرقت ايه عن البنات اللي بيلبسوا ضيق, الشبهة حرام

أنا: هاتلي آية أو حديث بيقولوا ان الشورت حرام

هو: آية أو حديث ايه أنت مش مسلم يابني

!

أنا: لأ مسلم

هو: لأ مش مسلم

مصدقنيش غير لما طلعتله البطاقة وشاف محمد

أنا: هو علشان بقولك كده مبقاش مسلم, أنا مقتنع ان احنا ماشيين ورا شيوخ مفسّرين حاجات كتير في ديننا غلط

هو: زي مين مثلا ؟

أنا: محمد حسان مثلا

هو: أنت مش مقتنع بفضيلة الشيخ محمد حسان, أومال مسلم ازاي بقى وبعدين أنت طريقتك كده بتقول انك 6 ابريل

!

أنا: مش عيب اني مقتنعش بيه على فكرة وهو مش معصوم من الخطأ علشان أي حاجة يقولها أقتنع بيها

جت بعد كده سيرة مجلس الشعب وسألني ايه رأيك في عصام سلطان ؟

من القليلين اللي اتكلموا عن حق الشهداء والقصاص بصراحة

هو: شهداء ايه وبعدين ما كل واحد فيهم أخد 200 ألف جنيه وبعدين عصام سلطان ده هيدخل السجن وهتترفع من عليه الحصانة بسبب البلاغات اللي مقدمها ضده مصطفى بكري

أنا: ما تيجي طيب أقتلك ابنك وأديك 200 ألف جنيه

!

قاللي وهو بيضحك ياعم أنت راجل طيب والله

..

كيف أئتمن مثل هذا التفكير على مستقبلي ومستقبل بلدي ؟

التيار الاسلامي لم يحرك ساكناً والناس بتموت في الميدان في أحداث محمد محمود ومجلس الوزراء وغيرهم وكان شغله الشاغل كتابة الدستور ومقاعد البرلمان, بأي حق تطلب الآن وحدة الصف

!

ثورتي مستمرة طول ما حكم العسكر مستمر, ثورتك مستمرة حسب التيار أينما تذهب مصالحك فأنت هناك سواء مع العسكر أو الثوار

..عفواً أخي المتأسلم لن أضع يدي في يدكهل من المعقول أن تضع يدك في يد من باعوا دماءً أوصلتهم لما هم فيه الآن, في يد من كانوا يشوهوك عندما كنت تطالب بحق الشهداء وبالقصاص وتهتف ضد المجلس العسكري وماذا يضمن لك عندما تتوحد معهم لن يبيعوك مرة آخرى عندما توصلهم الى ما يريدون ونحن نعلم كل العلم ماذا يريدون